LAOAG CITY – Inpetteng ni Kamanggagawa Party-list Representative Eli San Fernando iti Kamara pakairamanan iti National Bureau of Investigation (NBI) ken dadduma pay a maseknan nga ahensia ti gobierno a saan nga ikkan ti clearance ken dadduma pay a kapada a dokumento ni dati a Rep. Elizaldy Co.
Iti nailungalong nga House Resolution No. 435 ket inpetteng ni San Fernando a rumbeng a saan a maipaayan ti clearance ni Co kabayatan a maim-imbestigaran daytoy iti maipagarup a pannakairamanna iti maanomalya a flood control projects.
Inbatadna a nasken a personal nga agaplikar ni Co ti clearance kadagiti nagduduma nga ahensia ti gobierno.
Nadakamat ni San Fernando a manarimaan ti pannakapapirma kadagiti departamento ti Kamara ti “accountability clearance” ni Co ken ti laengen accounting department ken Office of the Secretary General ti saan pay a nagpirma.
Innayonna nga adda dagiti nakasarsaritana nga empleado ti Kamara a kontra a maikkan ti accountability clearance ni Co gapu ta agbalin nga insulto daytoy iti institusion ken kadagiti dadduma pay a taga-gobierno nga agtungtungpal a naurnos kadagiti responsibilidadda.
