LAOAG CITY – Nagpanawagan ni Trillion Peso March Movement Spokesperson Howard Calleja a dagiti opisial ti gobierno a mapaneknekan a nagbasol iti korapsion ket nasken a mapatawan ti at-atiddog a pannakaibalud nga awan ti posibilidad a pardon.
Inbatad ni Calleja, ti korapsion ket maysa a problema nga agtultuloy a mangparparigat kadagiti umili ken mangperperdi iti talek iti gobierno.
Inpettengna a saan nga umdas ti simple laeng a pannakaibalud no diket kasapulan ti nadagdagsen a pannusa tapno agserbi a ballaag kadagiti dadduma pay nga opisial.
Ti Trillion Peso March Movement ket mangilunglungalong ti naig-iget a panagsungbat ken transparency iti gobierno a rinugian iti babaen ti simboliko a panagisuot ti puraw a t-shirt tunggal Biernes.
Inlawlawag ni Calleja a ti panawaganda ket saan a nakapokus iti maysa nga administrasion laeng no diket iti pakabuklan a sistema a nabayagen nga adda ti maanomalya a mapaspasamak.
Gagem ti tignay nga ipakita ti panagkaykaysa dagiti umili kontra iti korapsion ken ipetteng ti reporma para iti nadaldalus a gobierno.
