LAOAG CITY – Inpetteng ni 1Sambayan spokesperson Atty. Howard Calleja a no naan-anay nga alaen kas state witness ni dati a Department of Public Works and Highways (DPWH) Secretary Manuel Bonoan iti flood control scandal, masapolnga ibutaktak na amin dagiti karaman iti korapsyon.
Kunana a kasapulan nga agbalin a nalawa ken makapnek ti testimonya na.
Inlawlawag na a masapol a sakopen ti testimonya ni Bonoan dagiti nagan ti amin nga opisyal, agpanpanday linteg, contractor ken dadduma pay a possible a karaman iti naibutaktak a kickback scheme iti flood control ken dadduma pay a public infrastructure projects.
Gapu ta nabayagen iti serbisyo ni Bonoan ken nagserbi met iti nagduduma nga administrasyon, saan laeng a rebbeng a limitado iti agdama nga administrasyon ti ibutaktak na kas state witness.
Kuna na a masapol nga ipublikar ti gobierno ti testimonya ni Bonoan tapno makita ti umili no siasinno dagiti dadakkel a nagan ti possible a karaman iti flood control issue, ken saan a mailemmeng iti publiko.
Innayon na a ti napateg ti iseserrek ni Bonoan kas testigo ket saan laeng a tapno malusutan ti pagsungsungbatan no di ket agbalin a rangtay tapno maamoan dagiti dadakkel a nagan a karaman iti korapsyon.
