LAOAG CITY – Mangnamnama ni Engr. Erickson Biag, ti Municipal Agriculturist iti ili ti Currimao a ngumato iti 10 agingga iti 15 nga ektarya ti mamulaan ti tabako iti nasao nga ili.
Segun kenkuana, gapu kadagiti maipapaay a tulong manipod iti Local a Gobierno ket magutgutigot dagiti mannalon nga agmula ti tabako.
Kunana nga inisyatibo ni Mayor Edward Boyet Quilala ti pannakaipaay ti 30 a ribo a pisos iti tunggal ektarya ken mabalin a manayunan pay agdepende no mano ti balor dagiti madadael a mula.
Innayon na a malaksid kadagiti madadaelan, ket adda pay ti maipaay a tulong kadagiti amin nga agmulmula ti tabako iti nasao nga ili.
Naamoan nga iti agdama ket addan ti 821 nga ektarya dagiti namulaanen ti tabako ita a season.
