LAOAG CITY – Nabirukanen a bangkay ti maysa a lalaki nga immunan a naireport a naiyanud iti kabaybayan a paset ti Barangay Caparispisan iti ili ti Pagudpud idi Nobyembre 12 ita a tawen.
Segun ken ni Police Major Carlo Abing, ti chief of police iti ili ti Pagudpud, ti ti biktima ket agtawen ti 27, taga Cavite, kaserserrek na laeng nga agtrabaho iti Renewable Corporation iti ili ti Pagudpud.
Inlawlawag na a basar iti imbestigasyon da, ti biktima ken dagiti papagayam na ket naggiinom da ti arak kalpasan na ket napan da nagpagpagna iti igid ti baybay.
Nupay kasta, bigla lattan a napan timmapog ti biktima iti danom ken gapu iti kinadawel ti dalluyon ket naiyanud daytoy.
Iti naisayangkat ti search ken retrieval operation ket nakita ti bangkay ti biktima iti kabaybayan a paset ti Barangay Poblacion iti nadakamat nga ili.
Nagturong met a dagus ti pamilya ti biktima ditoy probinsya ken manamnama ti panangibiyahe da a dagus ti bangkay na idiay Cavite.
Kabayatanna, inbalakad ni Major Abing iti publiko a no makainom ti arak ket saan a mapan tumappog iti danom tapno maliklikan ti pannakalmes.
