LAOAG CITY – Naiget a naglikudan da Senador Mark Villar, dati a Senador Grace Poe ken dati a Senador ken itan Education Secretary Sonny Angara dagiti alegasion kontra kadakuada ni dati a Department of Public Works and Highways (DPWH) Usec. Roberto Bernardo mainaig iti maanomalya a flood control projects.
Maipalagip nga iti supplemental affidavit ni Bernardo iti panagdengngeg ti Blue Ribbon Committee ket dinakamatna dagitoy nga immawat ti commitment wenno komision manipud kadagiti government projects iti babaen kadagiti staff-da.
Inawagan ni Villar a saan a pudno ti nagbalin a testimonia ni Bernardo ken direkta a naglikudanna dagiti akusasion daytoy.
Inbatad ni Villar nga awan ti naalas a rekordna kas nabayagen a public servant manipud iti panagbalinna a pannakabagi iti Kamara, Department of Public Works and Highways Secretary ken itan maysa a Senador ditoy pagilian.
Makaalarma met para ken ni Poe a nadakamat ti naganna iti Blue Ribbon hearing gapu ta saan pulos a nairaman isuna iti korapsion ken kabaelanna daytoy nga ibaga kadagiti Pilipino.
Agtalek ni Poe a kitaen a naimbag ti Department of Justice (DOJ) dagiti akusasion ken kagiddan ti panangsuportarna kadagiti imbestigasion rason a simmango isuna iti umuna nga imbestigasion ti Independent Commission for Infrastructure (ICI).
Inpetteng met ni Angara nga iti 21 a tawenna iti gobierno ket saan a nairaman isuna iti aniaman nga isyu ti maanomalya ken naiget a naglikudanna ti akusasion kadagiti maanomalya a proyekto.
Nangiruar ni Mayor Nancy Binay ti statement iti social media account-na ket ditoy nga inrakurakna a naulimek daytoy nga agtrabtrabaho kas Mayor ti Makati ken awan ti pakainaiganna wenno aniaman nga akem kadagiti proyekto iti flood control projects.
Kabayatanna, naminsan manen a naglikudan da Senador Chiz Escudero, Senador Jinggoy Estrada ken dati a Senador Bong Revilla ti akusasion ken kunada a kayatda laeng a dadaelen ti reputasionda.
