LAOAG CITY – Balligi ti pannakaiyuswat ti Dugong Bombo 2025: A Little Pain, A Life to Gain ti Bombo Radyo Philippines a naiyuswat iti SM City ditoy ciudad ti Laoag.
Ditoy Ilocos Norte, umabot iti 136 nga indibidual ti boluntaryo a nagidonar, katukad ti 61,200 a CC iti dara.
Inbatad ni Police Officer Denni Bagaoisan a kanayon ti panagidonar na ti dara gapo iti kinapateg daytoy kadagiti agkasapulan.
Segun kenni Bagaoisan, regular ti panagidonar na iti dara iti Red Cross ken makipagpaspaset iti Dugong Bombo.
Inlawlawag na a napintas daytoy nga aktibidad gpo ta ado dagiti agkasapulan ti dara iti probinsya ken iti pagilyan.
Kuna met ni Mr. Bryan Jay Taylan iti Barangay 15-B Alay iti ili ti Badoc a daytoy ti ummuna a gundaway a nagpaikkat ti dara ken makipagpaset iti Dugong Bombo ken naragsak gapo ta ammo na a makatulong iti sabali a tao.
Inbatad na a gapo ta napadasan nan ti agidonar iti dara ket inpasigurado a maulit to manen daytoy.
Ti Dugong Bombo ket naiyuswat kadagiti 25 key areas ti Bombo Radyo Philippines ken tinawen daytoy a maisaysayangkat kadua na ti Bombo Radyo Philippines Foundation Inc. ken Philippine Red Cross
