LAOAG CITY – Inbilin ni Senador Imee Marcos iti Ilocos Norte Electric Cooperative wenno INEC nga ipababa pay ti presio ti kuriente ditoy probinsia.
Daytoy ti inpakaammo ni Ilocos Norte Electric Cooperative Acting General Manager Cipriano Perry Martinez.
Segun kenkuana, iti agdama ket adda ti lima a pisos iti kada kilowatt-hour ti masingsingir kadagiti Member Consumer-Owners.
Inbatadna a saan pay a mapnek ni Sen. Imee Marcos iti agdama a presio ti kuriente ditoy probinsia.
Gapu iti daytoy, inlawlawagna nga ikarkarigatan ti kooperatiba nga agaramid ti wagas tapno in-inot a magun-od ti kalikagum ti Senadora ditoy probinsia.
Inpasingkedna ti napinpintas pay a serbisio a maipaay kadagiti amin a Member Consumer-Owners ditoy probinsia babaen ti nayon a manpower ti kooperatiba.
