LAOAG CITY – Nakarekobre dagiti otoridad ti baro a mapapati nga human skeletal remains iti naiwayat a search and retrieval operation iti Taal Lake idiay Batangas.
Basar iti Batangas Police Provincial Office (BPPO), 26 pay a pedaso ti tulang ti nakita dagiti personnel ti Laurel Municipal Police Station, dagiti divers ken retrieval teams iti Sector 2, Quadrant 3, Lane 2 ti Taal Lake.
Ti nasao nga area ti intudo ti Missing Sabungeros whistleblower a ni Julie “Dondon” Patidongan no sadinno nga inbellengda dagiti mapukpukaw a mammallot.
Naikabil dagiti tulang iti maysa a black fine net a naala iti designated dive site.
Insigida met a nai-turn-over dagiti tulang iti Scene of the Crime Operatives (SOCO) para iti panangtingiting.
Iti agdama, kasapulan pay a duktalen dagiti otoridad ti pakabigbigan dagiti tulang ken no ania ti rason no apay a naibelleng dagitoy iti dan-aw.
