LAOAG CITY – Napilaanen ti kaso a panaglabsing ti Republic Act 9165 wenno Comprehensive Dangerous Drugs Act of 2002 ti Barangay Secretary iti Barangay 17 ditoy ciudad ti Laoag kalpasan a natiliw iti naiwayat nga anti-illegal drug buy-bust operation.
Segun ken ni Police Lt. Col. Andrew Rabang, ti chief of police ditoy ciudad ti Laoag, ti agtawen ti 48 a suspek ket addan ti immuna a pannakatiliw na gapu iti illegal a droga idi 2016.
Kuna na a ti suspek ket maibilang kas High Value Individual.
Inpakaammo ni Rabang nga iti naisayangkat nga anti-illegal drug buy-bust operation ket naglako ti suspek ti maysa a sachet a naglaon ti maipagarop a shabu nga agdagsen ti 1.5 a gramo iti nagpammarang a poseur-buyer.
Iti panangkapkap dagiti otoridad iti nasao a suspek ket nakakumpiskar da pay iti ikotna ti 5 a sachet a naglaon metlaeng ti maatap a shabu nga agdagsen ti 5.7 grams, sumagmamano a drug paraphernalia ken adda pay ti maysa a plastic sachet a naglaon ti maipagarop a napagango a marijuana.
Mainaig iti daytoy, iti pannakisarsarita ti news team ti Bombo Radyo Laoag iti suspek ket naiget a naglikudan na ti alegasyon kontra kenkuana.
Inpasingked ti suspek a nabayagen a nagbalbaliw isut gapuna a masdaaw iti panangarestar da kenkuana.
