LAOAG CITY – Dumanonen iti 90 nga indibidual ti natay ken 12 dagiti mapukpukaw gapu iti sumagmamano nga aldaw a napigsa a tudo a nangitunda ti panaglayos ken panagreggaay ti daga idiay Vietnam.
Segun iti gobierno ti Vietnam, nadadael ti 186 a ribu a pagtaengan iti nasao a pagilian idinto nga adda ti sumurok tallo a milyon a taraken nga ayup ti naiyanod.
Nakaro a naapektaran ti mountainous province ti Dak Lak nga adda ti sumurok 60 ti pimmusay a nairekord sipod idi Nobiembre 16.
Daytoy ti kaudian a layos a napasaran ti Vietnam kalpasan a dimmuprak ti Bagyo Kalmaegi ken Bagyo Bualo kadagiti napalabas a lawas.
Basar kadagiti otoridad, adda ti 258 a ribu a tattao ti napukawan ti suplay ti kuriente idinto a napaserraan dagiti motorways ken train tracks.
Naammoan a dagiti ad-adda a naapektaran ket ti lima a probinsia kas iti Quang Ngai, Gia Lai, Dak Lak, Khanh Hoa ken Lam Dong iti south ken south-central Vietnam.
Kabayatanna, indauluan ni Prime Minister Phạm Minh Chính ti virtual emergency meeting manipud idiay South Africa a napan nagatendar iti G20 summit.
