LAOAG CITY – Naala iti CCTV ti panagtakaw ti maysa a lalaki ti mula dtoy ciudad ti Laoag
Segun kenni Mr. Andy Mariano Doronio, ti akinkukua ti mula a daytoy nga insidente ket napasamak iti oras ti 1:38 ti parbangon, Nobiembre 24, 2025.
Mabuya iti CCTV ti maysa a lalaki a nakalugan ti kurong kurong no sadinno apaman a limmabas iti Salvosa Apartment iti Brgy. 2 ditoy ciudad ti Laoag ket immasideg iti ayan ti mula ken ginabot na ken kalpasan daytoy ket dagus a naglibas.
Maluksaw met ni Doronio iti pannakatakaw ti mula na gapo ta daytoy ket nairegalo kenkuana no sadinno mapatta-patta nga agbalor iti dua ribo a pisos.
Inlawlawag ni Doronio a kalikagom na a maipublikar daytoy tapno maballaagan ti dadduma nga indibidual ken maipadanon iti akin-aramid a saan na nga uliten ti kastoy.
Kabayatanna, manamnama ti panagturong ti maseknan iti kuerpo ti pulisya tapno ireport ken mapalawag ti video footage tapno makita a nasayaat ti plate number ti kurong-kurong a nausar iti panagtakaw.
