LAOAG CITY – Naglikudan ni Department of Public Works and Highways Secretary Vince Dizon nga adda ti panagamakna iti panangipila ti kaso kontra ken ni dati nga House Speaker Martin Romualdez a kasinsin mismo ni Presidente Ferdinand Marcos Jr.
Inrekomendar ti Department of Public Works and Highways ken Independent Commission for Infrastructure (ICI) a kasoan ti plunder, graft ken direct bribery ni Romualdez pakairamanan ni dati nga Ako Bicol Partylist Representative Zaldy Co mainaig iti pannakairamanda iti maanomalya a flood control projects ditoy pagilian.
Iti plenary debates iti nailungalong a pundo ti Department of Public Works and Highways para iti 2026, temporario a sinuspenso ti rules ken napalubosan ni Dizon a direkta a sumungbat iti saludsod ni Senador Chiz Escudero.
Nasaludsod ni Escudero ni Dizon no addaan isuna ti panagdudua wenno panagdanag iti rekomendasion a mangipila ti kaso gapu iti relasion ti dati nga Speaker iti Presidente, inpetteng ni Dizon a nalawag ti pammilin ni Presidente Marcos a suroten laeng dagiti ebidensia.
Sinaludsod pay ti senador ti sekretario no kaano a napagdesisionan nga irekomendar ti kaso kontra ken ni Romualdez.
Sungbat ni Dizon, sumagmamano laeng a lawas ti napalabas idi nakumpleto ti nayon a dokumento manipud iti Department of Public Works and Highways pakairamanan ti records ti Sunwest Corporation ken Hi-Tone Corporation, dagiti kompania a maikonkonektar ken ni Zaldy Co.
Karaman pay kadagiti naisubmitir nga ebidensia ti sinapataan a testimonia ni dati a Philippine Marines Technical Sergeant Orly Regala Guteza iti Senate Blue Ribbon Committee iti baet ti isyu iti notario ti affidavit-na.
Kabayatanna, mainaig iti kaso a naipila ken ni Co, inbatad ni Dizon a nabayagen nga inrekomendar ti Independent Commission for Infrastructure ken Department of Public Works and Highways ti panangipila ti kaso kontra ken ni Co mainaig iti maipagarup nga iregularidad iti flood control projects idiay Oriental Mindoro.
Kunana a daytoy ti nagbalin a nangibasaran ti umuna a kaso nga inpila ti Ombudsman iti Sandiganbayan a nagresulta iti pannakaiparuk-at ti warrants of arrest kontra ken ni Co, sumagmamano nga opisial ti Department of Public Works and Highways ken dagiti pribado nga indibidual.
