LAOAG CITY – Maysa nga ama ti maipagarup a rinamesna ti step daughter-na ti namin-lima a daras iti Barangay 1 San Lorenzo ditoy siudad ti Laoag.
Basar iti Laoag City Police Station, nakita ti ina ti suspek a bisbisongen ti anakna ti menor de edad nga agtawen ti 15 iti mismo kuarto ti agasawa.
Gapu iti daytoy, insigida nga inpakaammo ti ina ti suspek ti napasamak iti katuganganna wenno ina ti menor edad nga insigida met dagitoy a nag-report iti kuerpo ti pulisia.
Nagturong dagiti otoridad iti pagtaengan ti biktima ket ditoy a natiliwda ti suspek no sadinno a kabayatan ti panagkapkapda ket nakumpiskarda manipud iti bulssa ti suspek ti uppat nga open transparent plastic sachet, uppat nga heat sealed transparent plastic sachet a naglaon ti maatap a shabu ken dadduma pay a drug paraphernalia.
Iti imbestigasion dagiti otoridad, datin a naarestar ti suspek gapu met laeng iti kaso iti panaglabsing iti Republic Act No. 9165 wenno ti Comprehensive Dangerous Drugs Act of 2002.
Mainaig iti daytoy, saan metten a nangipaay ti aniaman a komento ti suspek maipanggep kadagiti maiyak-akusar kenkuana.
Naammoan a ti menor de edad ket masansan a mabatbati iti pagtaenganda kaduana ti step father-na gapu ta makumikom ti inana iti trabahona.
Rumrummuar a saan nga insigida nga inpulong ti menor de edad ti mapaspasamak kenkuana iti inana gapu ta mabuteng daytoy.
Naduktalan a rinames ti nasao nga step father ti menor de edad idi Nobiembre 22 agingga iti Nobiembre 29 ita a tawen.
Iti agdama, ti menor de edad ket naipasidong iti Women and Children Protection Desk ti Laoag City Police Station.
Kabayatanna, pinadas ti Bombo Radyo Laoag News Team ti mangala ti naan-anay a detalye iti ina ti menor de edad ngem linappedan daytoy ti Women and Children Protection Desk ti Laoag City Police Station kas panangprotekta iti biktima.
