LAOAG CITY –Nangisayangkat ti pressconference ti Ilocos Norte Anti-Corruption Movement iti Conference Hall ti United Church of the Philippines kagiddan ti pannakaiwayat ti “Trillion Peso March” babaen kadagiti nagduduma a grupo iti intero a pagilian.
Daytoy ket tapno irakurak ti naiget a panangkontra da dagiti mapaspasamak a korapsyon iti pagilian nga isu ti ad-adda a mangparparigat kadagiti Pilipino.
Iti panagsarita ni Fr. Arvin Mangrubang, Regional Governor ti National Priest Organization ti Independent Filipino Church ken miembro ti Ilocos Norte Anti-Corruption Movement,ti kangrunaan a dinakamat na a naiget a kontraen ti grupo da ket dagiti development projects a makadadael iti aglawlaw ken pagbiagan dagiti umili.
Inpetteng na a karaman ditoyen dagiti renewable energy projects no sadinno nga ado dagiti residente a mapapanaw iti bukod da a lote tapno isu ti pakaipatakderan dagiti nasao a proyekto.
Kuna na a gapu kadagitoy a mapaspasamak ket agresulta ti pannakaapektar iti panagbiag ken pagbiagan dagiti naruay a Pilipino, karaman ditoyen dagiti mannalon, mangngalap ken dadduma pay.
Kwinestyunaran pay ni Father Malicad no apay a nagtalinaed a nangato ti singir iti kuryente ditoy probinsya idinto nga ado metten dagiti naestablisar a wind ken solar farm.
Mainaig iti daytoy, inpetteng ni Father Randy Manicap iti Kaammoyo ti Kappia a gapu iti mapaspasamak a korapsyon ket saan laeng a kaipapanan daytoy ti pannakapukaw ti pondo no di ket mekanismo tapno ipiten ti karbengan dagiti aktibista, mangmangged, mannalon ken dadduma pay a grupo.
Kabayatanna, ipanpanawagan met ni Angelica Galimba, ti Regional Director ti Kabataang Partylist iti Ilocos Norte para iti pudno a panagbalbaliw iti pagilian manipod iti kangatoan a posisyon partikular iti opisina ni Presidente Ferdinand Marcos Jr.
Inpaganetget na pay a ti presidente ti kaudian a makakita ti mailatang a pondo para iti pagilian isut gapuna a dakkel ti posibilidad na a makita na dagiti budget insertions ken uray dagiti unprogrammed fund.
Gapu kadagiti mapaspasamak a korapsyon iti gobierno ket nagpanawagan ni Galimba a rumbeng laeng nga agresign nga agpada da Presidente Marcos Jr. ken ni Vice President Sara Duterte gapu ta awanen ti kredibilidad da.
Malaksid iti korapsyon, inpetteng pay ni Galimba a ni Presidente Marcos Jr. ti responsable iti nakaro a militarisasyon a mapaspasamak kadagiti komunidad ditoy probinsya.
