LAOAG CITY – Inpakaammo ni Mayor Markee Chua iti siudad ti Batac nga adda ti 2 a K9 Bomb-Sniffing Dogs a nai-deploy iti Mariano Marcos State University manipud iti Philippine National Police gapu kadagiti nagsasaruno a bomb threat iti kallabes.
Segun kenkuana, nangiwayat ti namindua a daras ti Sangguniang Panlungsod iti siudad ti Batac ti committee hearing maipanggep kadagiti maaw-awat a bomb threat iti nasao nga unibersidad tapno ditoy a matalantan dagiti napapateg a banag a rumbeng nga aramiden ti tunggal maysa.
Inbatadna nga adda ti naisayangkat a panagtataripnongda kaduana ni Gov. Cecilia Araneta Marcos mainaig iti daytoy tapno nakasagana a tumulong ti lokal a gobierno iti maseknan nga unibersidad.
Kabayatanna, mangnamnama ni Mayor Chua nga agsardengen ti mapaspasamak a bomb threat ken matiliwen dagiti adda iti likudan dagitoy nga insidente.
