LAOAG CITY – Nagun-od ti Laoag City General Hospital ti 4-GREEN STAR RATING manipud iti Green and Safe Health Facility (GSHF) Program ti Department of Health.
Ti nasao a pammigbig ket gapu iti kinadalus, naurnos ken pannakasurot dagiti wagas a panangsaluad iti aglawlaw ti pasilidad ti nadakamat nga ospital
Segun kenni Dr. Marsha Lou Wapan, ti Officer in Charge ti Laoag City General Hospital, adda dagiti programa nga inar-aramid da kas ti energy conservation, gardening ken dadduma pay tapno magun-od ti pammadayaw .
Kunana a nakita ti Department of Health ti napintas a pannakaiturong ti ospital ken pannakamentenar kadagiti nagduduma nga inobasyon ken program kas iti energy conservation, gardening ken dadduma pay.
Kabayatanna, inpanamnama na ti napinpintas pay a serbiso a maipaay kadagiti pasyente nga agturong iti Laoag City General Hospital.
Innayon na a ti nasao a pammigbig ket gapu iti panagtitinnulong dagiti agpapaay ken agturturong iti Laoag City General Hospital ken ti gobierno lokal ditoy ciudad ti Laoag.
