LAOAG CITY – Inakusaran ni Ukrainian Foreign Minister Andrii Sybiha ni Pres. Vladimir Putin a saysayangen na ti oras ti intero a lubong, maysa nga adaw kalpasan a ti high-stakes talks iti nabaetan ti US ken Russia mainaig iti panangleppas ti gubat iti Ukraine ket napaay a maaddaan ti positibo a resulta.
Inbatad na a nasken nga isardeng ti Russia ti rinugyan na a gubat ken no saan a mapasamak daytoy ket masapol a sangwen ni Putin ti epekto na.
Nupay kasta, kunana nga inbaga ti delegasyon ti US kadagiti kakadua na a ti saritaan ket addaan ti “positive significance” para iti peace process” ken inimbitaran da dagiti Ukrainian officials iti sumaruno a saritaan.
Ni special envoy Steve Witkoff ken ti manugang ni President Donald Trump a ni Jared Kushner ti nakisarita kenni Putin iti Kremlin iti uneg ti lima nga oras.
Kuna met ti White House a nabagaan dan ni Trump iti napagsasaritaan da ken inawagan da daytoy a productive meeting.
