LAOAG CITY – Inrakurak ni Presidente Ferdinand Marcos Jr. a pilaanen ti kaso ti Office of the Ombudsman ti kontratista a ni Sarah Discaya ken dadduma pay a karaman iti naduktalan a ₱100 million ghost flood control project idiay Brgy. Kulaman, Jose Abad Santos, Davao Occidental.
Segun iti Presidente, indeklarar a “nalpasen” ti nasao a proyekto idi 2022 uray awan ti aniaman a konstruksion a napasamak.
Basar iti naiwayat nga inspeksion ti Criminal Investigation and Detection Group (CIDG) idi Setiembre 2025, awan ti aniaman a proyekto iti nasao a lugar banag a kinumpirmaran met dagiti residente ken barangay officials iti joint affidavit-da.
Palsipikado pay ti final billing, certificate of completion ken inspection reports nga insubmitir dagiti opisial.
Gapu iti daytoy, posible a sumango ni Discaya iti kaso a malversation through falsification a maysa a non bailable offense ken panaglabsing iti Anti-Graft and Corrupt Practices Act wenno Republic Act No. 3019.
Karaman iti makasoan ti Presidente ti St. Timothy Construction Corporation a ni Maria Roma Angeline Remando, dadduma pay nga executives ti kompania ken sumagmamano nga opisial ti Department of Public Works and Highways.
Mainaig iti daytoy, inbilin ti Presidente ti Department of the Interior and Local Government (DILG) ken Philippine National Police (PNP) a pangibasaran iti kaadda ni Discaya ken dadduma pay nga akusado tapno insigida a maarestarda apaman a mangiparuk-at ti arrest warrant ti korte.
