LAOAG CITY – Umabot iti 23 a tattao ti natay iti pannakauram ti mabigbig a nighclub iti coastal region ti Goa idiay India.
Rumrumuar a kaadoan kadagiti biktima ket dagiti turista ken staff iti club iti Arpora, North Goa.
Patien dagiti otoridad a ti bimtak a gas cylinder iti kusina ti club ti nangitunda ti uram ken alisto a nagramram.
Ibilang met ni Chief Minister Pramod Sawant ti napasamak kas “painful day” kadagiti amin nga agnanaed iti Goa.
Naamoan a tallo kadagiti natay ket nagsagaba ti nakaro a pannakauram ti bagi da idinto a dagiti dadduma ket gapu iti suffocation.
Agtultuloy paylaeng ti imbestigasyon dagiti otoridad tapno maamoan ti pudno a namonganayan iti uram, kagiddan ti panagballaag ti Sawant a sumango ti nadagsen a pannusa ti siasinno man a maduktakan a responsable iti napasamak.
Ti Goa ket dati a Portuguese colony iti Arabian Sea ken ti nightlife, sandy beaches, ken resorts ket isu ti makaawis kadagiti minilyon a turista iti kada tawen.
