LAOAG CITY – Saan a nangipaay ti komento ti Malacañang mainaig iti maipagarup a “credit grabber” ni Pres. Ferdinand Marcos Jr.
Daytoy ket kalpasan nga adda manen ti baro a pammabalaw ti kampo dagiti Duterte a maipagarup a credit grabber ni Presidente Marcos gapu iti nalpas a Bucana Bridge idiay Davao City.
Inbatad ni Palace Press Officer Atty. Claire Castro a saanen a patulan pay ti Palasyo dagiti banat nga aggapu laeng kadagiti langlangalang nangruna ket nalawag a responsibilidad ti Presidente a siguradoen a malmalpas ken pakabenbenepisiaran ti publiko dagiti proyekto.
Inpetteng ti Malacañang, awan ti tagtagikuaen ni Marcos gapu ta nalpas ti proyekto iti panawen ti administrasionna ken obligasionna nga ipakita daytoy kadagiti umili.
Maipalagip a nakaawat ti pammabalaw manipud kadagiti sumupsuportar ken ni dati a Presidente Rodrigo Duterte ti panagbisita ni Presidente Marcos iti rangtay nga inpettengda a proyekto iti napalabas nga administrasion.
Naikeddeng a lukatan inton Disiembre 15 ti Bucana Bridge a mamagkamang iti Barangay Bucana ken Matina Aplaya a manamnama a mangpalag-an iti taray ti trapiko ken mangipaay ti nam-ay nangruna ita a paskua.
