LAOAG CITY – Naipasan iti Sang Panlungsod ditoy ciudad ti Laoag ti ordinansa para iti pannakaestablisar ti “Panag-ipon Festival”.
Naisayangkat daytoy kabayatan ti regular session ti Sang Panlungsod no sadinno nga amin a kameng ti konseho ket pimmabor iti gakat.
Segun kenni Konsehal Bjorn Lao, ti chairman ti Committee on Tourism, ti panag-ipon ket maysa a gagangay a kultura ditoy Ilocos Norte aglalo kadagiti coastal area ditoy ciudad ti Laoag.
Innayon a nupay seasonal ti kaadda ti ipon ket maar-aramat iti nagduduma a delicacy.
Gapo iti daytoy, inbatad na a rumbeng a bigbigen daytoy a paseten ti biag dagiti ilocano aglalo kadagiti residente ditoy ciudad babaen ti pannakaestablisar ti panag-ipon festival.
Naipalaon iti nasao nga ordinansa a maisayangkat ti panag-ipon festival iti maysa a lawas ken mangrugi maibasar iti pannakaimatang ti umuna a full moon iti bulan ti nobiembre.
Inlawlawag ni Lao a ti pannakaimatang ti full moon ti mangipasimudaag kadagiti mangngalap nga isu met ti panagruwar ti ado nga ipon.
Segun kenni Lao, kalpasan a naaprubaran ti ordinansa ket maisayangkat ti festival iti Metro gabu, Lapaz ken Brgy. Caoacan ditoy ciudad.
Kunana nga adda pay dagiti aktibidad a maisayangkat kas iti bangka race ken dadduma pay.
