LAOAG CITY – Kinumpirmaran ti Department of Foreign Affairs (DFA) a napakaammoandan ti International Criminal Police Organization (Interpol) a nakanselaren ti pasaporte ti nagikkat iti puesto a ni Ako Bicol Party List Representative Zaldy Co.
Inbatad ni Foreign Affairs Spokesperson Ambassador Angelica Escalona, naawat ti Department of Foreign Affairs idi Disiembre 10 ti resolution ti Sandiganbayan a mangibilbilin iti pannakakanselar ti pasaporte ti dati nga agpanpanday linteg.
Inlawlawag ti Department of Foreign Affairs official a naipakaammoda metten iti Interpol office iti Pilipinas, a Philippine Center on Transnational Crimes, ti pannakakanselar ti pasaporte ni Co ken i-report iti Interpol national ken ipakaammo kadagiti amin nga international border control tapno ikabil iti alert system ti pasaporte ni Co.
Maipanggep met iti maipagarup a posible nga iggem ni Co a golden passport, inbatad ti Department of Foreign Affairs official a ti laeng Portuguese government ti makasungbat iti daytoy.
Kunana a saan nga amin a Pilipino a makaal-ala ti foreign citizenship ken foreign passport ket agrep-report iti Department of Foreign Affairs.
Maipalagip a kinumpirmaran ni Department of the Interior and Local Government (DILG) Undersecretary for Public Affairs and Communications Donnie Puno a rinugianen ti ahensia ti pannakikoordinar ti gobierno ti Portugal tapno maberipikar ti nasao a report mainaig iti Portuguese passport ni Co.
Immuna iti daytoy, immunan nga inbutaktak ni Department of the Interior and Local Government Sec. Jonvic Remulla a namonitor ti maudi a lokasion ni Co iti Portugal.
