LAOAG CITY – Nagpanawagan ni Presidente Ferdinand Marcos Jr. kadagiti sumaruno nga administrasion a siguradoen a regular nga imentinar dagiti imprastraktura ti pagilian kagiddan ti apagapaman a panaglukat ti San Juanico Bridge.
Segun iti Presidente, dumanon iti agarup a P1 bilyon ti ginastos iti rehabilitasion ti rangtay, maysa a gastos a naliklikan koma no nagtultuloy ti inspeksion ken maintenance.
Kinumpirmaran daytoy dagiti engineer a mangibagbaga a saan koman a kinasapulan ti retrofitting no nasayaat a nataripato ti rangtay.
Inpetteng ni Marcos ti problema a napasaran dagiti motorista ken ti epekto daytoy iti panagbiag dagiti tattao nangruna iti panagbiahe kadagiti taraon ken dadduma pay a produkto gapu iti limitado a pagdalyasatan dagiti lugan.
Maipalagip nga idi Mayo ket nalimitaran iti tallo a tonelada dagiti lugan a mabalin a dumalyasat iti San Juanico Bridge kalpasan a naduktalan a kimmapsot ti integridad daytoy gapu iti kinakurang ti maintenance.
