LAOAG CITY – Innagananen ti United States ti notorious drug-trafficking organization idiay Colombia kas terrorist group.
Innayon ti US Treasury Department ti grupo a mabigbigbig kas Clan del Golfo or Gulf Clan iti listaan dagiti Foreign Terrorist Organisations (FTOs).
Daytoy ket sumagmamano nga oras kalpasan a pinirmaan ni US President Donald Trump ti maysa nga executive order a mangibagbaga a ti drug fentanyl ket maysa a “weapon of mass destruction”.
Naamoan a dagiti addang ti Amerika ket kas panangpaget iti war on drugs ti administrasyon ni Trump no sadinno umabot pay iti nasurok 20 lethal strikes ti inyuswat na iti bangka a mapapati a nagkarga ti droga iti Caribbean ken Pacific.
Nasurok a 90 a tattao ti natay iti strikes ken inawagan dagiti legal experts a panaglabsing iti linteg.
Ti Clan del Golfo ket isu ti kaudian a Latin American criminal group a nairaman iti Foreign Terrorist Organizations iti listaan ti US Treasury.
