LAOAG CITY – Kinumpirmaran ni Department of the Interior and Local Government (DILG) Secretary Jonvic Remulla a bangkay ti dati a Department of Public Works and Highways (DPWH) USec. Catalina Cabral ti nasarakan idiay Tuba, Benguet.
Segun kenni Remulla, ti makagapuiti ipapatay ti dati nga opisial ket “blunt force trauma consistent with a fall.”
Pinasingkedan ti sekretario dagiti findings no sadinno awan ti nakita a sugat manipud iti tama ti paltog wenno dadduma pay a pakakitaan ti foul play.
Dagiti sugat a sinagaba ti dati nga opisyal ket gapu iti pannakaregreg manipud iti nangato a lugar.
Inpakaammo pay ni Remulla a naituding nga ipaima ti asawa ni Cabral dagiti personal a gamit na kadagiti imbestigador kalpasan ti pannakaitabon ti dati nga opisyal.
Maysa ni Cabral kadagiti napateg a personalidad a nairaman iti nalawa a kurapsion a mainaig kadagiti flood control iti Bulacan.
Maipalagip a naduktalan a natay ni Cabral kalpasan a mapapati a natnag iti derraas iti asideg ti Karayan Bued iti igid ti Kennon Road idiay Tuba, Benguet.
