LAOAG CITY – Inpetteng ni Manila Second District Rep. Rolando Valeriano kadagiti law enforcement ken national security agencies a saan a taga-bassiten ti panagturong ditoy Pilipinas dagiti terorista a nangpaltog iti Bondi Beach idiay Australia.
Kuna ni Valeriano, saan a nasken nga insigida nga ibilang a saan a pangta iti seguridad ti nadakamat nga agama a nangpaltog iti Bondi Beach a nakatayan ti 15 nga indibidual.
Panawagan ni Valeriano, ammoen ken adalen ti financial transactions dagiti nasao a terorista sakbay ken kabayatan nga addada ditoy Pilipinas idi Nobiembre ken idi nakatalaw dagitoyen.
Mainaig iti daytoy, inpalagip ni Valeriano a ti House Committee on Public Order and Safety ket addaan ti oversight authority iti Bureau of Immigration (BI), Philippine National Police (PNP) ken National Bureau of Investigation (NBI).
Inpasigurado ni Valeriano a naiget a bantayan ti komite ti imbestigasion iti panagtalinaed ditoy pagilian ti Bondi Beach terrorists.
