LAOAG CITY – Rinugianen dagiti opisial ti militar manipud idiay Thailand ken Cambodia ti panagsinnarita mainaig iti pannakaitultuloy ti ceasefire.
Daytoy ket kalpasan ti sumagmamano nga aldaw nga immannugot ti dua a pagilian a talantanen ti pannakaitultuloy ti ceasefire.
Naipursige ti panagsinnarita, dua nga aldaw kalpasan ti special meeting a panagtataripnong dagiti Southeast Asian foreign ministers idiay Kuala Lumpur tapno gandaten nga isalbar ti maysa a truce nga immuna nga indauluan ti Association of Southeast Asian Nations wenno ASEAN chair Malaysia ken United States President Donald Trump kalpasan ti umuna a rikos ti gubat idi Hulio.
Inbatad ti pannakangiwat ti Thai Defense Ministry a ni Rear Admiral Surasant Kongsiri a ti taripnong iti General Border Committee ket agpaut ti tallo nga aldaw ken mabalin a mangipaay ti wagas para iti maysa a katulagan.
Kunana a naiyuswat ti panagsinnarita iti border checkpoint nga agturong iti abagatan iti 817 a kilometro wenno 508 a milya a border ti dua a pagilian.
Kabayatanna, ti nasao a panagtataripnong ket maibilang a kapapatgan nga addang sipod idi nangrugi manen ti rinnupak ti Thailand ken Cambodia.
Maipalagip nga adda ti 86 nga indibidual ti natay gapu iti naiget a rinnupak ti Thailand ken Cambodia.
Immuna iti daytoy, saan a nagballigi ti panangikagumaan ti Malaysia, China ken Estados Unidos a masolbar iti nagbaetan ti dua a pagilian.
