LAOAG CITY – Nagsagaba ti sugat iti ulo ti maysa a tricycle driver iti napasamak a disgrasya iti C-5 iti ili ti Sarrat.
Segun ken ni Police Capt. Ashley Cacayorin, ti chief of police iti ili ti Sarrat, ti biktima ket agtawen ti 44, residente iti Brgy. 55-C, Vira ditoy ciudad ti Laoag.
Inbatad na a basar iti imbestigasyon da, kabayatan nga agpapalaud ti biktima ket naidungpar iti sementado a poste isut gapuna a napukawan iti control iti iturturong na a tricycle.
Kuna ni Cacayorin a gapu iti napasamak ket naipurwak ti biktima a nangitunda ti panagsagaba na iti sugat, aglalo iti ulo na.
Inpakaammo ni Cacayorin a naitaray ti biktima iti Governor Roque Ablan Senior Memorial Hospital para iti pannakataming na, ngem kabayatan ti kaadda na iti ospital ket narekobre iti ikotna ti maysa a glass tooter nga adda pay ti nabati a residue ti maatap a droga, lighter, bala ken empty shell ti calibre 38 a paltog.
Immuna iti daytoy, iti panagsukimat dagiti otoridad kadagiti gamit ti biktima iti uneg ti tricycle na tapno agbiruk ti pakabigbigan ti driver ket ditoy a nakita da ti maysa a calibre 38 a paltog nga addaan ti innem a bala.
Ti nasao a tricycle driver ket agpaspasada ditoy ciudad ti Laoag ken naamoan a daytoy ket drug surrenderer.
Iti agdama, nagtalinaed iti ospital ti tricycle driver ken banbantayan dagiti pulis.
Innayon ni Cacayorin nga isagsagana dan ti reklamo mabalin da nga ipila kontra iti tricycle driver gapu kadagiti nakita a paltog, bala ken drug paraphernalia iti ikotna no sadinno a possible nga ipila da babaen iti inquest proceeding wenno iti regular filing.
