LAOAG CITY – Dumanonen iti 235 ti nairekord a kaso dagiti nasugatan gapu iti paputok mainaig iti panangsarabo ti baro a tawen, basar iti Department of Health (DOH) manipud idi Disiembre 21, 2025 agingga iti Enero 1, 2026.
Basar iti inparuk-at a datos ti ahensia, 62 a kaso dagiti nasugatan gapu iti paputok ti nairekord iti bisperas ti baro a tawen.
Inbatad ni Department of Health spokesperson Assistant Secretary Albert Domingo, namnamaen pay ti ahensia a manayonan ti pakabuklan a bilang dagiti biktima ti paputok iti umuna a lawas ti tawen, manipud Enero 1 agingga iti 5.
Ginutigot ti opisial ti publiko nga amin dagiti naputukan ti paputok uray kasano ti kabassit ti sugat ket masapul nga insigida a maitaray iti kaasitgan nga ospital tapno maliklikan ti tetanus.
Kabayatanna, nababbaba ngem 42% dagiti nairekord a kaso ita a tawen maidasig iti napalabas a tawen a dimmanon iti 403.
Rimmuar pay iti datos ti ahensia a kaaduan kadagiti biktima ket agtawen ti 19 ken agpababa.
