LAOAG CITY – Nakapasa ni Atty. April Mae Santos a maysa a Provincial Security Guard ti Provincial Government of Ilocos Norte iti kaliplippas a 2025 Bar Examinations.
Segun kenkuana, saanna a ninamnama a makapasa gapu ta ibilangna a karirigatan daytoy nga eksaminasion.
Nupay kasta, saan daytoy a napukawan ti namnama a magun-od ti arapaapna nga agbalin nga abugado.
Gapu iti daytoy, ingaedna ti agbasa iti Law School tapno saan a mapaay dagiti mangsupsuporta kenkuana kangrunaanna ti pamiliana.
Mainaig iti daytoy, kunana a nasapa a nag-time out isuna iti pagtrabtrabahoanna kas maysa a Provincial Security Guard iti Kapitolio Probinsial ken nagturong iti maysa a coffee shop nga agmaymaysa tapno ditoy nga urayen ti resulta ti 2025 Bar Examinations.
Inbatadna nga apaman a nakitana ti rimmuar a resulta ket arig saanna a maiyebkas ken mailawlawag ti kinaragsak a marikriknana kadayta a gundaway kagiddan ti panangipakaammona daytoy a napintas a damag iti pamiliana.
Inlawlawagna a saan a nagbalin a nalaka ti panagadalna iti abogasia gapu ta iti umuna a dua a tawen a nagbasa daytoy iti Law School ket kangitingitan ti COVID-19 pandemic isut gapuna a naka-online class dagitoy.
Inpettengna a dandani a saanna nga intuloy ti panagbasa iti abogasia gapu iti problema ti pinansial ngem inkarigatanna a nagaplikar ti scholarship iti gobierno probinsial idi 4th year law student daytoy a dakkel a tulong a nangsupusop kadagiti gastosenna iti panagadal.
Kalikagumna nga agtalinaed nga agtrabaho iti Provincial Government of Ilocos Norte no maikkan daytoy ti oportunidad a makaala ti napinpintas a posision.
Naammoan a daytoy ti maikadua a gundaway a nangala ti 2025 Bar Examinations ni Atty. Santos ken nakapasa isuna iti Criminology Licensure Examination idi 2019.
Kabayatanna, inpaganetget ni Atty. Santos nga iti baet kadagiti amin a nadadagsen a pannubok ken karit a simmangbay iti biagna kabayatan ti panagadalna iti abogasia ket kararag ken gaget ti nagbalin a tulbek para iti naan-anay a pannakagun-odna ti balligi.
