LAOAG CITY – Naiget nga inpetteng ni Senate President Vicente “Tito” Sotto III nga agtaltalinaed a konstitusional ti unprogrammed appropriations (UA) basar kadagiti immunan a desision ti Korte Suprema.
Daytoy ket mainaig iti petision nga inpila da Mamamayang Liberal Rep. Leila de Lima ken Caloocan Rep. Edgar Erice a mangkukuestionar iti P150.9 bilyon nga unprogrammed funds iti P6.793-trilyon a 2026 national budget.
Inbatad ni Sotto, ti unprogrammed appropriations ket agserserbi nga “standby appropriation” a mabalin laeng nga iruar no dimmalan iti naiget a panangtingiting.
Immunan nga in-veto ni Presidente Ferdinand Marcos Jr. ti pito nga unprogrammed appropriations nga agbalor ti P92.5 bilyon isut gapuna a nagtalinaed laengen a P150.9 bilyon para iti tallo a programa:
Support for Foreign-Assisted Projects – P97.306 bilyon
Program on Risk Management – P3.6 bilyon
AFP Revised Modernization Program – P50 bilyon
Iti baet nga inpaganetget dagiti petitioner a malablabsing ti unprogrammed appropriations iti Konstitusion gapu ta maipagarup a daytoy ket maibasar iti aktual a paggapgapoan ti pundo, inbatad ni Sotto a nalawag nga ipalpalubos daytoy ti Korte Suprema kadagiti immuna a desision.
Kunana a nadaldalus itan ti 2026 budget kalpasan nga inikkat dagiti kuestionable nga item.
