LAOAG CITY – Mamati ti Malakanyang a kalikagom laeng nga iliklik ti isyu ti impeachment kontra ken ni Vice President Sara Duterte isut gapuna nga agringgor dagiti supporters ti bise presidente nga agpila met ti impeachment complaint kontra ken ni Presidente Ferdinand Marcos Jr.
Inbutaktak ni Palace Press Officer USec Claire Castro, a basar iti impormasyon nga inburay ti maysa nga agpanpanday linteg, naamoan a dagiti supporters ti pamilya Duterte ti adda iti likudan ti plano nga impeachment complaint kontra iti presidente.
Inpasigurado met ni Castro a nakasagana ni Presidente Ferdinand “Bongbong” Marcos Jr. a sangwen ti reklamo ken respetaren na ti Konstitusyon ken dagiti proseso nga inkeddeng ti linteg.
Inbatad ni Castro nga awan ti pagibasaran ti alegasyon ti breach of public trust mainaig ti maipagarop a panagpirma ti presidente iti General Appropriations Act (GAA).
Inpetteng ti Palace official a saan a nagtakaw ti kwarta ti presidente ken isuna pay ti nangimandar ti imbestigasyon kadagiti maanomalya a flood control projects a possible a nangrugyan ti korapsiyon aglalo ket maipagarop nga awan ti isyu na kas ti “Mary Grace Piattos”.
Agtalek ti Malakanyang a saan a magna ti impeachment kontra ken ni Presidente Marcos Jr.
Iti agdama, awan pay ti pormal nga impeachment complaint kontra ken ni Presidente Marcos isut gapuna nga awan pay ti rebbeng a saganaan ti chief executive.
Inpalgak ni Castro a ti impeachment ket maysa a seryoso a proseso ti konstitusyonal ken saan a rumbeng nga usaren kas pangbutbuteng wenno pang-media.
Ginutigot na met dagiti kritiko nga unaen paylaeng a sungbatan dagiti isyu a sangsangwen ti supsuportaran da a lider.
