LAOAG CITY – Inbilinen ni Presidente Ferdinand Marcos Jr. kadagiti maseknan nga ahensia ti gobierno a rugian ti proseso para iti maysa nga extradition treaty idiay Portugal mainaig iti panagsubli ditoy pagilian ti wanted a dati nga agpanpanday linteg a ni Zaldy Co.
Inbatad ni Department of the Interior and Local Government Secretary Jonvic Remulla, kumpirmado ti pannakikoordinar ti gobierno iti Interpol para iti posible a repatriation ni Co.
Inlawlawag ni Remulla nga agkiddaw ti Pilipinas ti extradition treaty idiay Portugal kalpasan a nakaawat ti intelligence information a maipagarup nga adda ni Co iti nasao a pagilian ken adda ti iggemna a Portuguese passport.
Kunana nga agtultuloy ti pannakikoordinar ti gobierno kadagiti international partners tapno mapagsungbat ti dati nga agpanpanday linteg ken maisubli isuna iti hurisdiksion ti Pilipinas.
