LAOAG CITY – Nagballaag ti Department of the Interior and Local Government (DILG) kadagiti politiko kontra iti panaglabsing ti anti-“epal” rules, a mabalin a sumango da ti administrative sanctions, manipod iti suspensyon agingga iti possible a referral iti Office of the Ombudsman para kadagiti maulit-ulit nga aglabsing.
Segun ken ni Department of the Interior and Local Government Secretary Jonvic Remulla, ipawpawil dagiti guidelines manipod iti Department of Budget and Management ken ti Office of the President ti panagusar ti nagan, ladawan wenno logo dagiti pulitiko iti uray aniaman a proyekto a pinondoan ti gobierno.
Gapu iti daytoy, ginutigot ti Department of the Interior and Local Government ti publiko nga agpost no adda ti makita a paglabsingan dagiti pulitiko.
Inpetteng pay ni Remulla a masapol a ti makita laeng iti project markers ket ti project title, petsa ti award, start ken completion dates, contractor, ken source of funds.
Suportado met ti Department of the Interior and Local Government ti nailungalong a gakat para iti nalawlawag ken nadagdagsen a pannusa kontra iti “epal” practices.
