LAOAG CITY – Inbilin ni Presidente Ferdinand Marcos Jr. iti Philippine National police ken dadduma pay a law enforcement agencies ti naiget ken dagus a pannakaipatungpal ti linteg tapno mapagsungbat dagiti karaman iti kaso dagiti mapukpukaw a mammallot.
Inbatad ni Palace Press Officer Undersecretary Claire Castro a nalawag ti direktiba ni Presidente Marcos nga ipatungpal ti agdama a linteg, karaman ti pannakaarestar a dagus dagiti addaan ti warrant of arrest.
Immunan a nangiparuk-at ti arrest warrants ti Regional Trial Court ti Sta. Cruz, Laguna kontra kadagiti akusado karaman ti negosyante a ni Charlie Atong Ang iti kaso a kidnapping ken serious illegal detention mainaig iti panagpukaw dagiti sumagmamano a mammallot.
Umabot iti 34 a mammallot ti naireport a mapukpukaw sipud idi 2021 agingga iti 2022, a maipagarop nga adda ti pakainaigan iti match-fixing wenno panagswitik iti pallot.
Immunan a napan inserbi ti PNP ti warrant of arrest kontra ken ni Atong Ang ngem saan da a nakita ti nasao a negosyante.
