LAOAG CITY – Nakita a maysan a nalamiis a bangkay ti maysa a lalaki iti igid ti kalsada iti paset ti bypass road iti Barangay 30-B, Sta. Maria ditoy siudad ti Laoag.
Nabigbig ti biktima a ni Jerry Marcelo Domingo, agtawen ti 48 ken residente ti Barangay Dupitac iti ili ti Piddig.
Basar iti Laoag City Police Station, kabayatan a dumaldalyasat ti maysa a motorista ket nakitana ti biktima a nakapakleb iti akin-daya a paset ti kalsada nga adda ti dara iti sumagmamano a paset ti bagina.
Nakikoordinar dagiti otoridad iti pamilia ti biktima tapno iberipikar ti pakabigbigan ti biktima no sadinno a naammoan a ti biktima ket makapaspasar ti tuberculosis ken diabetes.
Mainaig iti daytoy, nangiwayat ni Dr. Rodrigo Catcatan, mangidadaulo ti City Health Office ditoy siudad ti Laoag ti post mortem examination ken indeklararna a ti rason ti pannakatay ti biktima ket gapu iti Hypovolemic shock secondary to upper GI bleeding versus massive hemoptysis.
Kabayatanna, awan ti pakalasinan nga adda ti foul play a napasamak iti insidente.
