LAOAG CITY – Inrakurak ti Department of Justice nga umaboten iti sumurok 300 a milyon a pisos ti gatad a nakolektar wenno nai-turn-over ti ‘restitution money’ manipud kadagiti maanomalya a flood control projects.
Segun ken ni Justice Secretary Fredderick Vida, ti pakabuklan ti maaw-awagan a ‘recovery of people’s money’ wenno panangisubli ti tinakaw a pundo ti gobierno ket umaboten iti P316, 381, 500.
Inbatadna a maiyataday daytoy iti katulagan iti nagbaetan ti ahensia ken dagiti napili nga ‘state witnesses’ para iti kaso nga adda ti pakainaiganna iti flood control.
Inlawlawagna a dagiti nakolektar a ‘restitution money’ ket aggapu kadagiti naisubli a kuarta ti uppat a testigo ti estado nga isuda dati a Public Works Usec. Roberto Bernardo, Henry Alcantara, Gerard Opulencia ken contractor a ni Sally Santos.
Nupay kasta, inpetteng ni Justice Sec. Vida a ti konsepto tapno maibilang kas ‘state witness’ iti kaso ket saan laeng a nakadepende iti maisubli a kuarta.
Kunana a paset ti proseso ti ‘recovery of people’s money’ wenno ad-adda nga am-ammo iti awag a ‘restitution of money’ kadagiti kondision nga idasdasar iti babaen ti Witness Protection Program.
Inpaganetgetna a saan a mabalin a kalpasan a nagtakaw ti kuarta ti maysa nga indibidual ken insublina daytoy ket otomatiko nga insigida nga ‘absuelto’ iti kaso.
Kinumpirmaran met ti Department of Justice a nangisubli ti gatad a P35-million ni dati a Department of Public Works and Highways Usec. Roberto Bernardo.
Inpakaammo ni Justice Usec. Felix Ty nga aggapu daytoy kadagiti inlako a sanikua ti dati nga opisial a ‘downpayment’ laeng.
Manamnama nga iti kanito a maala ti balanse iti nasao a sanikua ket makaisubli ti umabot 150 a milyon a pisos ni Bernardo kas maiyallubog iti katulagan.
