LAOAG CITY – Inpakaammo ni Mrs. Perlita Cabello, ti mangidadaulo ti City Social Welfare and Development ditoy ciudad ti Laoag nga adda manen ti maysa a centenarian a naipaayan ti 100 a ribo a pisos kas insentibo gapu iti pannakadanun nan iti tawen na.
Daytoy ket ni lola Juliana A. Corpuz manipud iti Barangay San Mateo ditoy ciudad ti Laoag.
Segun ken ni Cabello, sinelebraran ni lola Juliana ti maika-100 a kasangay na idi Setyembre 26, 2025.
Kunana kas panangbigbig daytoy a milestone, inpaayan ti gobierno lokal ditoy ciudad ti nasao a centenarian ti P100,000.00 ken plake.
Malaksid iti daytoy, makaawat to pay ni lola Juliana ti P100,000.00 manipud ti national government babaen ti National Commission of Senior Citizen.
Ni Lola Juliana ket maysa laeng kadagiti agarup 80 a centenarian ditoy siudad a mangipaneknek nga ado dagiti nasalun-at a Laoagueños.
Kabayatanna, kuna ni Cabello nga agtultuloy iti pannakaipaay ti tulong wenno insentibo kadagiti senior citizens ditoy ciudad ti Laoag.
