LAOAG CITY – Natay ti innem nga indibidual ken 20 ti nasugatan kalpasan ti napasamak nga uram iti maysa a shopping mall idiay Karachi, Pakistan.
Napasamak ti insidente idi rabii ti Sabado iti Gul Plaza shopping mall nga immabot ti sumurok 10 nga oras tapno naan-anay a makontrol ti nasao nga uram.
Inbatad ni South Deputy Inspector General Syed Asad Raza a ti nasao a mall ket pakairamanan ti 1,200 a shops no sadinno a narpuog pay dagiti sumagmamano a paset ti pasdek.
Basar iti inisyal nga imbestigasion dagiti otoridad, nangrugi ti apoy gapu iti panag-short circuit ti linya ti kuriente iti lugar.
Agtultuloy ti iwaywayat nga imbestigasion dagiti otoridad mainaig iti insidente idinto nga agpapaimbag iti ospital dagiti nasugatan a biktima.
