LAOAG CITY – Inbatad ni Vice President Sara Duterte a ti manamnama a maipila nga impeachment complaint kontra kenkuana intono Pebrero ita a tawen ket maipagarop a maysa laeng a “fundraising” dagiti agpanpanday linteg, kas kadagiti immunan a reklamo.
Iti maysa a media interview iti The Hague, Netherlands, nasaludsud ken ni Duterte maipanggep ti panag-expire ti maysa a tawen a ban ti Korte Suprema iti panagipila ti impeachment complaint kontra kenkuana iti sumaruno a bolan.
Insungbat ti bise presidente a namnamaen da ti pannakaipila manen ti impeachment complaint kontra kenkuana ngem kas iti kallabes ket maipanggep amin dagitoy iti kwarta.
Maipalagip nga idi Disyembre 2024, uppat nga impeachment complaint ti naipila kontra iti Bise Presidente.
Ti maikapat a reklamo ket naggapo iti imbestigasyon ti House good government and public accountability panel maipanggep iti panagusar ti confidential funds ti Office of the Vice President ken Department of Education, ken sinuportaran ti nasurok a 200 a miyembro ti Kamara de representantes idi Pebrero 2025.
Nagserbi met dagiti dokumento a nagibasaran iti impeachment ni Duterte iti kamara de representantes.
Idi Agosto 2025, nagbotos ti Senado ti 19-4, adda ti maysa nga abstention, tapno i-archive ti impeachment articles kalpasan nga indeklarar ti ideklarar ti Korte Suprema a mailabsing iti Konstitusyon ti reklamo.
