LAOAG CITY – Inpakaammo ni Sangguniang Panlungsod Member Jason Perera a nangiparuk-aten ti subpoena ti National Bureau of Investigation kontra iti Barangay Treasurer iti Brgy. Cataban ditoy siudad ti Laoag mainaig iti maipagarup a panagpukaw ti pundo ti barangay.
Inbatadna a nagkamang mismo dagiti maseknan nga opisial ti barangay iti opisinana tapno agkiddaw ti tulong wenno balakad maipanggep iti problema ti barangayda.
Inlawlawagna nga adda dagiti technical issues a kasapulan a solbaren iti daytoy a banag.
Kunana a kalpasan iti daytoy ket insigida nga inendorsona iti National Bureau of Investigation no sadinno nga idi laeng napalabas nga aldaw ket addan ti subpoena para iti pannakaisagana iti pannakaiproseso ti kaso kontra iti adda iti likudan iti daytoy.
Immuna iti daytoy, desidido dagiti barangay officials a pilaan ti kaso ti Barangay Treasurer gapu iti in-inot a panangiruarna ti 256 a ribu a pisos babaen ti 2024 budget ti barangay.
