LAOAG CITY – Dinadael ti Philippine Drug Enforcement Agency ken Philippine National Police ti 144 a plantation sites ti marijuana iti nagbedngan ti Ilocos Sur ken Benguet.
Segun ken ni Atty. Benjamin Gaspi, Regional Director ti Philippine Drug Enforcement Agency ti Region 1, adda ti kalawa a 106,500 square meters ti namulaan ti marijuana.
Inadmitirna a narigatanda iti inwayatda nga operasion gapu ta umabot iti 10 nga oras ti kabayag sakbay a nadanonda ti nasao a lugar no sadinno a ginundawayan metten dagiti adda iti likudan iti daytoy nga aglibas nga umadayo ken aglemmeng kadagiti otoridad.
Inpasingkedna a subliananda dagiti nadakamat a plantation sites tapno maipasigurado nga awanen dagiti naimula a marijuana iti masangoanan.
Inlawlawagna nga adda dagiti sumagmamano a paset iti Sugpon, Ilocos Sur ken Santol, La Union ti naiget nga imonmonitorda a pagmulmulaan kadagiti marijuana.
Maipalagip nga umabot iti 186 a milyon a pisos ti balor dagiti ginabot ken pinuuran dagiti otoridad a marijuana iti nagbedngan ti Ilocos Sur ken Benguet.
Naammoan a partikular a naiwayat ti operasion iti kabanbantayan a paset ti Barangay Licungan, Sugpon, Ilocos Sur ken Barangay Tacadang, Kibungan, Benguet, pakairamanan ti Mount Boa ken Mount Leteban.
Immuna iti daytoy, ti nasao nga operasion ket nagpaut ti innem nga aldaw no sadinno a nakagabotda ti 628,295 a poon ti marijuana nga agbalor ti P125,647,000.00; 211,795 a pedaso ti marijuana seedlings nga agbalor ti P44,471,800.00; ken 135 kilograms ti marijuana fruiting tops nga agbalor met ti 16,320,000.
