LAOAG CITY – Kinarit manen ni dati a Senador Antonio Trillanes ni Senator Ronald dela Rosa a boluntaryo a sangwen dagiti alegasyon kenkuana iti International Criminal Court (ICC) idiay The Hague, Netherlands.
Kinarit pay ti dati nga agpanpanday linteg nga agturong ni dela Rosa idiay The Hague ken kadwaen wenno bisitaen na ni dati a Presidente Rodrigo Duterte nga agdama a nakabalud iti International Criminal Court Detention Centre.
Kuna ni Trillanes a kasayaatan daytoy tapno malawlawagan no pudno nga adda ti warrant of arrest nga inparuka-at ti korte kontra kenkuana.
Manipod Nobiyembre 2025, saanen a nagpakita iti publiko ti dati a Philippine National Police (PNP) chief kalpasan nga adda ti impormasyon nga addan ti warrant kontra kenkuana.
