LAOAG CITY – Agsubli iti opisina ni House Secretary General Cheloy Garafil ita nga aldaw dagiti kongresista a kameng ti Makabayan Bloc a karaman kadagiti nangipila ti maikadua nga impeachment complaint kontra ken ni Presidente Ferdinand Marcos Jr.
Inbatad ni ACT Teachers Party-list Representative Antonio Tinio ti Makabayan Bloc, kalikagumda a siguradoen nga awatenen ita ti House Secretary General ti inendorsoda nga impeachment complaint kontra iti Presidente.
Maipalagip nga idi Huebes ket saan daytoy nga inawat ti opisina ni House Secretary Garafil gapu ta awan isuna gapu ta adda idiay Taiwan no sadinno a naipaayan ti pammigbig.
Inlawlawag ni Tinio a mangnamnamada nga awanen ti agbalin a rason wenno palusot ita ti House Secretary General tapno saan nga awaten ti reklamoda nga impeachment kontra iti Presidente.
Immuna iti daytoy, inpetteng ni Tinio kaduana da Representatives Renee Co ken Sara Jane Elago a maikonsideraren a naipilan ti impeachment complaint-da kontra ken ni Presidente Marcos nga inbatida iti opisina ni Garafil.
Inpaganetgetgda nga awan met iti House Rules a kasapulan daytoy a personal nga awaten ti mismo nga House Secretary General.
