LAOAG CITY – Nangipeksa ti pannakadismaya ti kampo ni dati a Presidente Rodrigo Roa Duterte kalpasan a nagkedked ti International Criminal Court (ICC) iti kiddawda nga idatag ti bukud nga ebidensia medikal.
Basar iti lead counsel a ni Atty. Nicholas Kaufman, maipagarup a linabsing ti Korte ti nakadawyan a proseso gapu ta saanda a naikkan ti gundaway a kwestionaren dagiti report dagiti eksperto a pinili dagiti hues.
Nangiparuk-at ti desision ti International Criminal Court idi Enero 26 a mangibagbaga a “fit to stand trial” ni Duterte basar iti panangtingiting ti tallo nga independent medical experts.
Ti ruling ket namunganay iti panangtingiting a naiwayat idi Disiembre 5, 2025 no sadinno a maikonsiderar nga adda ti kabaelan a makipaset iti panangtingiting ti dati a Presidente.
Gapu iti daytoy, inkeddeng ti International Criminal Court ti confirmation of charges hearing inton Pebrero 23 idiay The Hague.
Sumangsango ni Duterte kagiti kaso nga adda ti pakainaiganna iti maipagarup a nalawa a panaglabsing iti karebbengan dagiti tattao iti babaen ti kampaniana kontra iti droga.
Kabayatanna, inpetteng ti depensa a mangipilada ti apela tapno ilaban ti karebbengan ni Duterte iti due process.
Mamati dagiti abugadona a napateg a mangngeg ti takderda tapno masigurado a patas iti panangtingiting ti International Criminal Court.
