LAOAG CITY – Nasentensyaan a mabalud ti 20 a bolan ti asawa ti napadisi a presidente ti South Korea gapu iti panagawat na ti pasuksuk manipod iti kontrobersyal nga Unification Church.
Nupay kasta, dinalusan ti korte ti nagan ti agtawen ti 52 a ni Kim Keon Hee manipod kadagiti kaso nga stock price manipulation ken panagawat ti libre nga opinion polls manipod iti political broker sakbay ti 2022 presidential election, a nangabakan ti asawa na a ni Yoon Suk Yeol.
Immunan a nasentensyaan ni Yoon iti lima a tawen a pannakabalud gapu iti panagabuso ti turay ken obstructing justice nga adda ti pakainaigan iti napaay a martial law bid idi 2024.
Maibilang a pakasaritaan iti South Korea ti pannakakumbiktar nga agpada ti dati a presidential couple.
Maipalagip nga inrakurak ni Judge Woo In-sung iti Seoul Central District Court nga inusar ni Kim ti posisyon na tapno magun-od ken maipatungpal ti personal a pagsayaatan na.
Kabayatanna, iti statement ni Kim kalpasan ti pannakakumbiktar na, sipapakumbaba a nangawat ti nagbalin a desisyon ti korte ken nagpadespensar iti publiko gapu iti naaramidan na.
Maipalagip nga iti kallabes ket naiget a naglikudan ni Kim dagiti alegasyon kontra kenkuana.
