LAOAG CITY – Kinumpirmaran ni P/Maj. Antonio Marzan, Hepe ti Pinili Municipal Police Station nga addan ti person of interest-da iti maipagarup a pannakapapatay ti maysa a negosiante a ni Alejandre Arzadon iti Barangay Darat iti ili ti Pinili.
Nupay kasta, inlawlawag ni P/Maj. Marzan a saan pay a mabalin nga ibuksilan dagiti pakabigbigan dagiti maibilang a suspek iti insidente tapno saan a maapektaran ti panangiwayatda ti imbestigasion.
Inbatadna nga adda ti naalada a Close Circuit Television wenno CCTV footage iti maysa a gasoline station nga adda ti agarup 250 agingga iti 300 a metro ti kaadayona manipud iti nakapasamakan ti insidente no sadinno a mapaayaban dagiti indibidual a naala iti CCTV camera tapno mapagsaludsudan dagitoy a posible a makaipaay ti naan-anay nga impormasion.
Inpakaammona a desidido ti maysa kadagiti annak ti biktima a dumalan iti autopsy ti bangkay ti amana gapu ta mamati a saan a nagpakamatay daytoy no diket pinapatay ken tinakawanda pay.
Kunana a naikeddeng a dumalan iti autopsy ti bangkay ti biktima inton sumaruno a lawas tapno maammoan ti pudno a napasamak kenkuana nangruna ket basar iti post mortem examination ti Rural Health Unit iti ili ti Pinili nga adda ti gasgas iti ulo ken rupa ti biktima.
Kuna pay ni P/Maj. Marzan a manarimaan pay laeng ti imbestigasionda maipanggep iti maipagarup a mapukpukaw a kuarta ti biktima nga umabot iti 30 agingga iti 40 a ribu a pisos.
Inpettengna nga inwalinda metten iti imbestigasionda ti anggulo a nagpakamatay ti biktima gapu ta addan dagiti maitudtudo nga indibidual a person of interest.
Innayonna a maimbitaran pay iti kuerpo ti pulisia ti indibidual nga immutang ti 110 a ribu a pisos iti biktima, maysa a rabii sakbay ti krimen.
Maipalagip nga iti oras ti alas sais ti bigat ket nakigtot ti manugang ti biktima kalpasan a nakitana a nakatali iti tengnged ti katuganganna ken naigalot daytoy iti handle ti freezer.
Immuna iti daytoy, naammoan a namintallon a daras a natakawan ti karinderia ni Arzadon ngem ti pakasdaawan ni Marzan ket no apay a saanda pay laeng a nangimuntar ti Close Circuit Television camera iti nasao a pasdek.
