LAOAG CITY – Kinumpirmaran ni Mayor Ralph Conrad Medrano nga adda dagiti sumagmamano a proyekto ti Department of Public Works and Highways iti ili ti Sarrat ti naipasardeng.
Segun kenkuana, maysa kadagitoy ket ti road widening project iti paset ti south of the river iti nasao nga ili.
Inbatadna a ti kangrunaan a rason no apay a naipasardeng ti nasao a proyekto ket gapu iti kinakurang dagiti dokumento.
Inlawlawagna nga idi nagsaludsodda kadakuada no addan ti plano a maipatungpal maipanggep iti proyekto ket awan ti maipaay a naan-anay nga addang dagitoy.
Mainaig iti daytoy, inpetteng ni Mayor Medrano nga immun-una pay ti panagaramid ngem iti pannakaiwayat ti public hearing no sadinno a naruay a residente ti agrekreklamo kalpasan nga adda dagiti paset iti daga dagitoy ti naala.
Nupay kasta, kunana nga arig awan ti tignay nga ar-aramiden ti Department of Public Works and Highways tapno masolbar daytoy nga arungaing dagiti maseknan nga umili.
Inpaganetgetna a saanda a kontra kadagiti ipatpatungpal a proyekto ti ahensia ngem kalikagumda laeng a nasken a kumpleto dagiti dokumento ken proseso sakbay a maiyimplimentar ti maysa a proyekto iti lugarda.
