LAOAG CITY – Nagleppas a maibilang a pakasaritaan nga snowy snap election idiay Japan.
Daytoy ket kalpasan a nakagun-od ti landslide victory ti coalition ni Japan Prime Minister Sanae Takaichi, ti kaunaan a babai a Prime Minister iti pakasaritaan ti Japan, ti maibilang kas “fourth largest economy” iti intero a lubong.
Nagballigi ti Liberal Democratic Party (LDP) ti nasurok a 310 manipod iti 465 seats iti lower house ti Japan, daytoy ti kaunaan a gundaway sipud idi World War II a nakagun-od ti two-thirds majority vote ti maysa partido.
Maipalagip a naelektaran ni Takaichi kas baro a Prime Minister ti Japan idi Oktubre 21, 2025.
Ni Takaishi metlaeng ti mangidadaulo ti Liberal Democratic Party, ngem gapu ta saan a naala ti partido ti mayorya ti dua a pagpandayan ti parliamento, nagpaawag ti prime minister ti snap election tapno makagun-od ti direkta a mandato manipod iti umili.
Indanun a dagus ni US President Donald Trump ti pangablaaw na iti panangabak ni Takaichi.
Maipalagip a nakaawat ni Takaichi ti naidumduma a panangiyendorsar manipod iti US President no sadinno a kas pammaneknek ket inimbitaran pay ni Trump ti Japanese Prime Minister a bumisita iti White House intono Marso 19, 2026.
Iti agdama, sumangsango ti Japan iti sumagmamano a karit karaman ti alisto a panagado ti populasyon da, panagngato ti cost of living, kumapkapoy a balor ti yen, ken kumarkaro a tensyon iti relasyon iti China kalpasan ti rakurak ni Takaichi a possible a makibiang ti Japan iti Taiwan conflict.
